Fréttir

Skjaldborg – hátíð íslenskra heimildamynda hefst í kvöld, en hún fer venju samkvæmt fram um hvítasunnuhelgina á Patreksfirði. Skjaldborg er einstök og kraftmikil uppskeruhátíð heimildamyndahöfunda og sú eina á Íslandi sem sérhæfir sig í að frumsýna íslenskar heimildamyndir.

Vestfjarðastofa, með stuðningi Byggðastofnunar, auglýsir eftir verkefnisstjóra á Drangsnesi. Verkefnisstjóri gegnir hlutverki leiðtoga verkefnisins Brothættra byggða í Kaldrananeshreppi og vinnur að eflingu byggðar og mannlífs í Kaldrananeshreppi.

Stjórn fiskeldisjóðs hefur úthlutað rúmlega 465 milljónum kr. til 15 verkefna í sjö sveitarfélögum. Alls bárust 30 umsóknir frá sjö sveitarfélögum sem námu rúmlega 1,7 milljarði króna, tæplega fjórfalt hærri fjárhæð en var til úthlutunar. Umsóknarfrestur var til 10. mars og lauk úthlutun 19. maí.

Á morgun 3. júní fer fram næsti hádegisfyrirlestur Forvitinna frumkvöðla og þar mun Páll Baldursson taka fyrir stofnun og rekstur fyrirtækja. Farið verður yfir helstu form félaga og fyrirtækja í rekstri og þau borin saman. Skoðaðir verða helstu kostir og gallar mismunandi félagaforma, ábyrgð eiganda ofl. Jafnframt verður farið yfir hlutverk stjórna og skoðað hvaða reglur gilda um hver megi skuldbinda félag ásamt fleiru.

Sýningin Gullkistan Vestfirðir 2025 fer fram laugardaginn 6. september á milli kl. 12 og 17. Þá verður Íþróttahúsinu Torfnesi á Ísafirði umbreytt í sannkallaða Gullkistu – vettvang þar sem kraftur Vestfjarða í atvinnulífi og menningu birtist í allri sinni dýrð.

Háskólinn á Bifröst er að ýta úr vör nýrri örnámsleið í frumkvöðlafræðum. Námið er á ensku og sérstaklega hannað fyrir innflytjendur sem vilja taka fyrstu skrefin í átt að háskólanámi en um leið kynnast frumkvöðla og nýsköpunarumhverfinu á Íslandi. Markmiðið er að auðvelda þeim sem eru ekki íslenskumælandi að hefja háskólanám.

Nú er að hefjast vinna við mótun menningarstefnu fyrir Vestfirði. Haldnir verða fimm opnir fjarfundir, hver með sinni yfirskrift.

Úthlutun úr Barnamenningarsjóði fyrir árið 2025 fór fram á Degi barnsins sem haldinn er hátíðlegur síðasta sunnudag maímánaðar og bar að þessu sinni upp þann 25. maí. Vestfirska barnamenningarhátíðin Púkinn fékk styrk upp á 5,5 m.kr fyrir verkefnið Púkinn, hafið og sólmyrkvinn. Þrjár barnamenningarhátíðir á landsbyggðinni hlutu að þessu sinni hæstu styrkina, 5,5 m.kr. hver, en auk Púkans eru það barnamenningarhátíðin Bras á Austurlandi fyrir Þræði og Barnamenningarhátíð Vesturlands 2025.

Ungmennaþing Vestfjarða 2025 hlaut á dögunum styrk úr Erasmus+ áætluninni að upp á rúmlega 5.3 milljónir (36.642 evrur). Styrkurinn mun styðja við framkvæmd og þróun þingsins næstu mánuði, en Ungmennaþing Vestfjarða, sem verður haldið í haust, fer að þessu sinni fram í Breiðuvík.

Þriðjudaginn 27. maí verður haldinn alþjóðlegur vefviðburður þar sem fulltrúar samfélaganna í Örebro og Nordanstig segja frá sinni vegferð – frá hugmynd að stefnu og aðgerðum. Eftir erindi verður opið fyrir spurningar og umræður.