Púkinn stekkur af stað
Púkinn, barnamenningarhátíð Vestfjarða hefst í dag. Hér er dagskrá hátíðarinnar.
28. apríl 2026
Barnamenningarhátíðin Púkinn 2027 verður haldinn dagana 26. apríl–7. maí. Líkt og undanfarin ár valdi Ungmennaráð Vestfjarða þema hátíðarinnar sem að þessu sinni er framtíðin, jafnframt óskuðu þau eftir að unnið yrði með myndlist og verður lögð sérstök áhersla á það í vinnu með unglingastiginu þar sem þau munu takast á við veggjalist. Hátíðin fékk veglegan styrk úr Barnamenningarsjóði sem gerir vestfirskum börnum kleift að njóta listviðburða heima í héraði og hefur Púkinn átt í góðu samstarfi við grunnskólana á svæðinu sem gerir það að verkum að öll vestfirsk börn fá að njóta ávaxtanna. Það er allskonar skemmtilegt í pípunum og að vanda verðum við í góðu samstarfi við List fyrir alla.
Um síðustu hátíð: Barnamenningarhátíðin Púkinn var haldinn dagana 27. apríl-9. maí 2026. Á dagskrá hátíðarinnar að þessu sinni bar hæst Sólmyrkvaleikana, verkefni sem var unnið í samstarfi við hönnunarteymið Þykjó, Sigga&Ingibjörgu úr Þjóðsögukistunni og Sævar Helga Bragason, Stjörnu-Sævar. Annar meginpóstur voru kvikmyndanámskeið sem voru haldin í samstarfi við UngRIFF undir leiðsögn Erlings Óttar Thoroddsen og voru afurðirnar, margar frábærar stuttmyndir, sýndar víðsvegar um Vestfirði. Þriðja stórverkefnið hét Álfar og Irmlar, það var í samstarfi við List fyrir alla og unnið í samstarfi við Dúó Stemmu. Auk þeirra var fjöldi skemmtilegra viðburða sem voru staðbundnir og má sjá í dagskrá hátíðarinnar.
Púkinn er vettvangur fyrir vestfirsk börn að kynnast listum og menningu á fjölbreyttan hátt og einnig er hann kjörinn til allra handa samstarfs innan svæðisins. Púkinn er hugsaður sem vettvangur fyrir menningu með börnum, menningu fyrir börn og menningu sem börn skapa sjálf.
Grunnskólabörn á Vestfjörðum völdu nafnið Púkinn fyrir hátíðina. Er það vel við hæfi því á mörgum stöðum innan fjórðungsins hafa börn gjarnan verið kölluð púkar, þá ekki í neinni niðrandi merkingu heldur einvörðungu sem annað heiti yfir börn.
Vestfjarðastofa sinnir verkefnisstjórn hátíðarinnar en framkvæmdaaðilar viðburða eru menningarstofnanir, skólar, einstaklingar og samtök.
Hátíðin er styrkt af Barnamenningarsjóði, Vísindasmiðju HÍ og Erasmus+
Hátíðin á í góðu samstarfi við List fyrir alla, RIFF og Hönnunarhópinn Þykjó.
Starfsmaður verkefnis
