Barnamenningarhátíðin Púkinn

Barnamenningarhátíðin Púkinn var haldinn dagana 27. apríl-9. maí 2026. Á dagskrá hátíðarinnar að þessu sinni bar hæst Sólmyrkvaleikana, verkefni sem var unnið í samstarfi við hönnunarteymið Þykjó, Sigga&Ingibjörgu úr Þjóðsögukistunni og Sævar Helga Bragason, Stjörnu-Sævar. Annar meginpóstur voru kvikmyndanámskeið sem voru haldin í samstarfi við UngRIFF undir leiðsögn Erlings Óttar Thoroddsen og voru afurðirnar, margar frábærar stuttmyndir, sýndar víðsvegar um Vestfirði. Þriðja stórverkefnið hét Álfar og Irmlar, það var í samstarfi við List fyrir alla og unnið í samstarfi við Dúó Stemmu. Auk þeirra var fjöldi skemmtilegra viðburða sem voru staðbundnir og má sjá í dagskrá hátíðarinnar.

Púkinn er vettvangur fyrir vestfirsk börn að kynnast listum og menningu á fjölbreyttan hátt og einnig er hann kjörinn til allra handa samstarfs innan svæðisins. Púkinn er hugsaður sem vettvangur fyrir menningu með börnum, menningu fyrir börn og menningu sem börn skapa sjálf.

Grunnskólabörn á Vestfjörðum völdu nafnið Púkinn fyrir hátíðina. Er það vel við hæfi því á mörgum stöðum innan fjórðungsins hafa börn gjarnan verið kölluð púkar, þá ekki í neinni niðrandi merkingu heldur einvörðungu sem annað heiti yfir börn.

Vestfjarðastofa sinnir verkefnisstjórn hátíðarinnar en framkvæmdaaðilar viðburða eru menningarstofnanir, skólar, einstaklingar og samtök.

Hér má fylla út lokaskýrslu.

Hátíðin er styrkt af Barnamenningarsjóði, Vísindasmiðju HÍ og Erasmus+
Hátíðin á í góðu samstarfi við List fyrir alla, RIFF og Hönnunarhópinn Þykjó.