Á Vestfjörðum er blómlegt menningarlíf. Í gegnum tíðina hefur heimafólk verið iðið við að bæta lífskilyrði við ysta haf með öflugu lista- og menningarlífi. Grasrótarstarf hefur verið öflugt og má sem dæmi nefna áhugaleikfélög og kóra sem hafa skapað grundvöll fyrir skapandi samverustundir fyrir þá sem taka þátt og gefandi afrakstur fyrir aðnjótendur. Lista- og menningarstarf í fjórðungnum er þó ekki einungis áhugamál sem fólk dundar sér við í frístundum. Teljandi fjöldi á Vestfjörðum sem hefur atvinnu innan menningar- og skapandi greina og fjöldi fólks hefur sótt sér menntun á þeim sviðum. Menning og afþreying er raunverulegt byggðamál sem skiptir máli, það er ráðandi þáttur í byggðafestu hér á landi og getur haft úrslitavald yfir því hvort fólk telji staði almennt vænlega til búsetu. Það er því mikið til þess að vinna að tryggja stoðkerfi menningarlífsins svo það fái sem best þrifist í fjórðungnum.
Uppbyggingarsjóður Vestfjarða hefur verið einn helsti bakhjarl menningar og nýsköpunar á Vestfjörðum allt frá því er hann veitti fyrst styrki árið 2015. Í dag er úthlutað úr Uppbyggingarsjóði einu sinni á ári, umsóknarfrestur rennur út í októbermánuði og kemur í ljós í byrjun desember hvaða verkefni hafa hlotið brautargengi úr sjóðnum til komandi árs.
Menningarfulltrúi
Skúli Gautason hefur verið menningarfulltrúi Vestfjarða frá árinu 2016 og er hann með starfsstöð á Hólmavík. Hlutverk menningarfulltrúa er að styðja við margvíslega uppbyggingu í menningargeiranum sérstaklega þegar kemur að samtali og samstarfi milli ólíkra greina eða á milli svæða. Efling grasrótarstarfs er afar mikilvægt og leitast menningarfulltrúi við að hvetja fólk til dáða, veitir ráðgjöf á sviði menningarmála og aðstoðar við hugmyndaþróun og áætlanagerð. Hann veitir einnig rekstrarráðgjöf með áherslu á menningu og listir til einstaklinga, félagasamtaka, fyrirtækja, sveitarfélaga og stofnana.
Menningarfulltrúi er talsmaður menningar á Vestfjörðum og vinnur að því að gera veg vestfirskrar menningar sem mestan. Hann aðstoðar við að tengja fólk saman sem leitar eftir samstarfi bæði innan landshlutans, milli landshluta og út fyrir landsteinana.
Mikið er lagt upp úr samstarfi við aðra landshluta á sviði menningar. Menningarfulltrúar landshlutanna hittast reglulega á fjarfundum og bera saman bækur sínar. Auk þess hafa þau hist að jafnaði tvisvar á ári á staðfundum, annað skiptið á landsbyggðinni til að kynnast því sem vel er gert á mismunandi stöðum og hitt í Reykjavík til að hitta forsvarsmenn stofnana og samtaka í menningargeiranum. Þar má nefna ráðuneyti menningarmála, Sviðslistamiðstöð, Íslandsstofu, Bandalag íslenskra listamanna, Tónlistarmiðstöð og RÚV.
Söfn og sýningar
Á Vestfjörðum er á fjórða tug safna og sýninga. Byggðasöfn, minjasöfn og aðrar gerðir sem leggja áherslu á að miðla vestfirskum menningarsérkennum og sögu svæðisins. Árið 2021 vann Vestfjarðastofa skýrslu í samstarfi við söfn á Vestfjörðum um stöðu þeirra og samstarfsmöguleika. Skýrsluna má finna hér til hliðar
Starfsmaður
