Fréttir

Þriðjudaginn 3. mars kl.15 boðar Ísafjarðarbær í samstarfi við Aldrei fór ég suður og Vestfjarðastofu til vinnustofu í Edinborgarhúsinu á Ísafirði þar sem markmiðið er að móta sameiginlega sýn og aðgerðir hagaðila páska fyrir vestan. Þau sem starfa í verslunar- og veitingarekstri, ferðaþjónustu og viðburðahaldi, auk fulltrúa frá sveitarfélögunum eru sérstaklega hvött til að mæta.

FRESTAÐ - Vegna óhagstæðrar veðurspár hefur verið ákveðið að fresta Orkuþingi Vestfjarða um óákveðinn tíma. Við þökkum áhugann og vonumst til að sjá sem flesta á nýjum auglýstum tíma. Orkuþing Vestfjarða verður haldið föstudaginn 6. mars í Edinborgarhúsinu á Ísafirði. Þar munu helstu hagaðilar í orkumálum svæðisins koma saman til að ræða stöðu, framtíðarsýn og tækifæri í orkuuppbyggingu á Vestfjörðum.

Fimmtudaginn 26. febrúar verður fyrsta úthlutunarathöfn Frumkvæðissjóðs Jú víst! Kraftur í Kaldrana haldin. Athöfnin fer fram í Verslunarfélagi Drangsness og hefst klukkan 16:00. Boðið verður upp á kaffi og með því fyrir gesti og gangandi. Íbúar Kaldrananeshrepps eru hvattir til að fjölmenna og fagna með þeim sem hlotið hafa styrk að þessu sinni.

Þann 11. febrúar fór fram vefnámskeið á vegum MERSE-verkefnisins undir yfirskriftinni Scaling up cooperation in Rural Areas. Alls tóku 45 þátttakendur þátt víðs vegar að úr Evrópu og var þar varpað fram einni kjarnaspurningu: Hvernig geta samvinnufélög vaxið án þess að fórna lýðræði, sjálfbærni og staðbundnu eignaraðild? Þátttakendur komu frá Svíþjóð, Noregi, Írlandi, Finnlandi, Íslandi, Rúmeníu, Ítalíu og fleiri löndum. Hópurinn var fjölbreyttur; fræðafólk, fulltrúar sveitarfélaga, ráðgjafar í atvinnuráðgjöf og samvinnurekstri og frumkvöðlar í dreifbýli - góð blanda ólíkra aðila sem koma að byggðaþróun með einum eða öðrum hætti.

Aðgerðabanki RECET er hagnýtt verkfæri sniðið að þörfum sveitarfélaga á Íslandi við gerð aðgerðaáætlana í orkuskiptum og loftslagsmálum. Bankinn er safn aðgerða sem nýtast sem grunnur að heildstæðum aðgerðaáætlunum í loftslagsáætlunum með alls 49 aðgerðum á sviði orkuskipta, orkunýtni, breyttra ferðavenja, fræðslu og aukinnar sjálfbærni í rekstri sveitarfélaga.

Eyjólfur Ármannsson innviðaráðherra hefur úthlutað styrkjum að upphæð 170 milljónum kr. til fjórtán fjölbreyttra verkefna til að efla viðkvæmar byggðir landsins. Framlag til styrkjanna kemur af byggðaáætlun (aðgerð C.1 – Sértæk verkefni sóknaráætlanasvæða) en alls bárust 28 umsóknir fyrir um 756 m.kr. Þetta er hæsta úthlutun úr þessari aðgerð á tímabili gildandi byggðaáætlunar. Fjórir styrkir að heildarupphæð 56 m.kr komu í hlut verkefna á Vestfjörðum.

Kynningartillaga Svæðisskipulags Vestfjarða verður til umfjöllunar á opnum fundum sem hér segir: 24. febrúar: Félagsheimiið á Hólmavík 25. febrúar: Edinborgarhúsið á Ísafirði 10. mars : Félagsheimili Patreksfjarðar (upphaflega boðaður 26. febrúar, en ferstað vegna slæms veðurútlits Fundirnir hefjast klukkan 17:00 og eru öllum opnir.

Næsti viðburður í röðinni Forvitnir frumkvöðlar verður haldinn 3. mars kl. 12:00 og að þessu sinni er það Auður Ösp Ólafsdóttir sem stígur á svið. Auður er sjálfstætt starfandi ráðgjafi og markaðsstjóri hjá Keeps CMS, með yfir tuttugu ára reynslu úr ferðaþjónustu. Hún rak eigið ferðaþjónustufyrirtæki og ferðaskrifstofu í nærri áratug og þekkir því vel hversu krefjandi það getur verið að bera marga hatta og taka mikilvægar ákvarðanir með takmörkuð fjárráð og tíma.

Í byrjun febrúar tók Markaðsstofa Vestfjarða þátt í vinnustofum Kuoni Tumlare í Taípei, Osaka og Tókýó, þar sem Norðurlönd og Eystrasaltsríki kynntu áfangastaði sína fyrir kaupendum frá Japan, Tævan og Suður-Kóreu. Heimsóknin er hluti af vetrarverkefni Markaðsstofunnar, sem miðar að því að styrkja Vestfirði sem áfangastað allt árið um kring.

Púkinn, barnamenningarhátíð á Vestfjörðum, verður haldin dagana 27. apríl – 8. maí 2026. Þema hátíðarinnar var valið af Ungmennaráði Vestfjarða og er það hafið, en einnig var farið fram á að tengja saman vísindi og listir. Hægt er að sækja um styrki til að vera með viðburði tengda hátíðinni. Markmið með sjóðnum er að tryggja vestfirskum börnum vandaða menningarviðburði til að njóta eða taka þátt í. Ef viðburðirnir fara ekki fram á meðan á hátíðinni stendur er mælst til að hægt verði að njóta afraksturs þeirra innan dagsetninga hennar.