Fréttabréf nóvembermánaðar er komið út, brakandi ferskt og stútfullt af efni. Nóvember er jafnan annasamur, en nú jafnvel enn frekar en áður í ljósi snemmbúinna Alþingiskosninga. Utan venjubundinna starfa fór Markaðsstofan á WTM sýninguna í London, fundur atvinnuráðgjafa var haldinn á Austurlandi og árlegur vinnufundur starfsmanna og stjórnar var haldinn svo fátt eitt sé nefnt.

Úthlutunarnefnd og fagráð Uppbyggingarsjóðs Vestfjarða hafa lokið störfum við yfirferð á styrkumsóknum vegna ársins 2025. Alls bárust 98 umsóknir í sjóðinn og hlutu 60 verkefni styrkvilyrði, alls að upphæð 60.000.000 kr.

Hæfnisetur ferðaþjónustunnar, Samtök ferðaþjónustunnar og Markaðsstofur landshlutanna bjóða til Menntamorguns ferðaþjónustunnar miðvikudaginn 4.desember kl. 11:00-12:00.

Rannsóknasetur skapandi greina stóð fyrir málþingi þann 20. nóvember síðastliðinn í Háskólanum á Akureyri, þar sem fjallað var um áhrif menningar og skapandi greina í landsbyggðum og hlutverki þessara þátta í þróun þeirra.

Innviðafélag Vestfjarða boðar í dag til fundar um efnahagsævintýrið á Vestfjörðum. Fundurinn verður haldinn í Skjaldborgarbíó á Patreksfirði og hefst hann kl. 17. Soffía Eydís Björgvinsdóttir hjá KPMG kynnir þar niðurstöður á greiningu á skatta- og samfélagsspori Vestfjarða sem unnin hefur verið fyrir Innviðafélag Vestfjarða. Einnig mun Hjörtur Methúsalemsson hjá Arnarlaxi, fjalla um framtíðarsýn fiskeldis á Vestfjörðum til 2035.

Byggðastofnun, Vestfjarðastofa og Reykhólahreppur hafa undirritað samning um þátttöku Reykhólahrepps í byggðaþróunarverkefninu Brothættar byggðir. Byggðarlagið er það fimmtánda í röðinni sem hefur þátttöku í verkefninu frá því að það hóf göngu sína á Raufarhöfn árið 2012.

Blásið var til lokahófs ferðaþjónustunnar á Vestfjörðum fimmtudaginn 14.nóvember. Fyrirhugað var að halda hófið í raunheimum en þar sem veðrið lék Vestfirðinga grátt þurfti að færa það yfir í netheima. Tveir fyrirlesarar úr ferðaþjónustunni voru fengnir til þess að flytja erindi, Hjalti Már Einarsson forstjóri Datera og Renée Blankenstein leiðsögumaður og sérfræðingur hjá Láki Tours.

Markaðsstofa Vestfjarða ásamt fulltrúum Íslandsstofu og annarra markaðsstofa á landinu tóku þátt í hinni árlegu ferðasýningu World Travel Market (WTM) í London dagana 5.–7. nóvember. Sýningin sem var haldin í Excel sýningarhöllinni í London er ein stærsta ferðasýning heims. Laðaði hún að sér um 46.000 gesti alls staðar að úr heiminum, þar á meðal 5.049 kaupendur og yfir 4.000 sýnendur.

Byggðastofnun hefur gefið út Stöðugreiningu landshlutanna 2024. Stöðugreiningin er ítarleg skýrsla sem skipt er í þrettán flokka, allt frá mannfjöldaþróun til efnahagsþróunar og lýðheilsu. Hver þessara þrettán flokka skiptis í marga undirflokka þar sem farið er yfir vítt svið af opinberum gögnum til að gefa sem besta mynd af því hvernig landshlutarnir standa hver um sig í hinum ýmsu málaflokkum.

Mannamót Markaðsstofa landshlutanna verða haldin 16. janúar 2025 Mannamót Markaðsstofa landshlutanna er árleg ferðakaupstefna sem haldin er af Markaðsstofum landshlutanna. Mannamót markaðsstofanna er kynningarvettvangur ferðaþjónustunnar á landsbyggðinni og tækifæri til að koma á fundum fagaðila í greininni. Markmið og tilgangur viðburðarins er að skapa vettvang þar sem landsbyggðarfyrirtæki fá tækifæri til að kynna sína þjónustu og vöruframboð fyrir ferðaþjónustuaðilum sem staðsettir eru á höfuðborgarsvæðinu. Ísland hefur mikið upp á að bjóða og Mannamót hjálpa til við að mynda tengsl innan ferðaþjónustunnar. Gestum á Mannamótum gefst kostur á kynna sér það sem mismunandi landshlutar eru að bjóða uppá.