Fréttir

Í dag fara fram Mannamót Markaðsstofa landshlutanna í Kórnum í Kópavogi. Advania á Íslandi og Markaðsstofur landshlutanna hafa tekið höndum saman og standa fyrir beinni útsendingu frá Kórnum þar sem rætt verður við aðila innan ferðaþjónustunnar og fleiri góða gesti.

Hjörleifur Finnsson verkefnastjóri umhverfis- og loftslagsmála hjá Vestfjarðastofu verður í Vísindaporti Háskólaseturs Vestfjarða föstudaginn 17. janúar. Þar mun hann kynna niðurstöður nýútkominnar skýrslu um kolefnisjöfnun á Vestfjörðum. Skýrslan er liður í gerð loftslagsstefnu fyrir sveitarfélögin á Vestfjörðum þar sem meðal annars er kveðið á um áætlun um kolefnisjöfnun.

Mannamót Markaðsstofa landshlutanna verða haldin á morgun 16. janúar í Kórnum í Kópavogi. Margir þekkja orðið mannamótin þar sem þau eru árviss ferðakaupstefna markaðstofanna í landinu.

Ferðaþjónustuvikan 2025 hófst í dag og stendur hún fram á fimmtudag. Viðburðurinn er ekki nýr af nálinni og sem fyrr er þar lögð áhersla á að auka vitund um mikilvægi ferðaþjónustu og efla samstarf og fagmennsku í greininni með fróðlegri og skemmtilegri dagskrá. Aðstandendur Ferðaþjónustuvikunnar eru Markaðsstofur landshlutanna, Íslenski ferðaklasinn, Samtök ferðaþjónustunnar, Ferðamálastofa og Íslandsstofa.

Erna Lea Bergsteinsdóttir hefur verið ráðin í starf verkefnastjóra farsældar hjá Vestfjarðastofu. Auglýst var eftir umsóknum í nóvember síðastliðnum og bárust 10 umsóknir um starfið.

Á þriðjudag fór fram fyrsti fyrirlestur á vegum Forvitinna frumkvöðla, en það er heiti fyrirlestraraðar á vegum landshlutasamtakanna á Íslandi: Austurbrúar, SASS, SSNE, SSNV, SSS, SSV og Vestfjarðarstofu. Það var Arnar Sigurðsson sem reið á vaðið og fjallaði fyrirlestur hans um frumkvöðlaferlið, sem er vel við hæfi til að setja tóninn fyrir framhaldið hjá þeim fjölmörgu gerðum frumkvöðla sem fyrirfinnast hér á landi. Gaman var að sjá góða mætingu á viðburðinn og finna þakklætið fyrir framtakið.

Gefin hafa verið út frumdrög Svæðisskipulags Vestfjarða 2025-2050. Við gerð þess var ákveðið að vinna með ólíka valkosti samfélagsþróunar næstu 25 árin, byggða í grunninn á mannfjöldaþróun.

Fréttabréf Vestfjarðastofu fyrir desembermánuð er komið út! Það er með óhefðbundnu sniði þar sem í því er nú að finna áramótapistla starfsfólks. Þar fer það yfir helstu verkefni sín á árinu sem nú er að líða og gægist yfir áramótin inn í nýtt og spennandi starfsár. Það eru ófá verkefnin sem unnin eru á Vestfjarðastofu og gefur blaðið smá innsýn í þá ríkulegu flóru sem starfsfólkið tekst á við í störfum sínum.

Sveitarfélögin á Vestfjörðum hafa nú í nokkurn tíma undirbúið gerð loftslagsstefnu sem mun setja markmið og aðgerðaáætlun um orkuskipti og samdrátt í losun gróðurhúsalofttegunda. En í lögum um lofslagsmál er einnig gerð krafa um að gerð sé áætlun um kolefnisjöfnun, þ.e að sú losun sem ekki tekst að eyða verði kolefnisjöfnuð. Hjá Vestfjarðastofu var ákveðið með tilliti til þessa að taka saman skýrslu um málið sem nú er komin út. Verkefnið fékk styrk frá umhverfis-, orku- og loftslagsráðuneyti til kaupa á ráðgjöf við skýrslugerðina sem fengin var hjá Verkís, en verkið var að mestu unnið af Vestfjarðastofu.

Arnar Sigurðsson hjá samfélagslegu tilraunstofunni Austan mána ríður á vaðið í fyrirlestraröðinni Forvitnir frumkvöðlar og fjallar hann um frumkvöðlaferlið. Fyrirlesturinn verður á TEAMS þriðjudaginn 7. janúar kl.12.