Fréttir

Opnað hefur verið fyrir umsóknir um styrki úr Lóu. Styrkirnir eru nýsköpunarstyrkir fyrir landsbyggðina sem hafa það hlutverk að styðja við eflingu byggða og landshluta með nýskapandi verkefnum. Styrkjunum er aðeins úthlutað til verkefna utan höfuðborgarsvæðisins í þeim tilgangi að styðja við atvinnulíf og verðmætasköpun sem byggir á hugviti, þekkingu og nýrri færni.

Undirbúningur fyrir barnamenningarhátíðina Púkann 2024 er kominn á fullt skrið og verður hann haldinn dagana 15.-26. apríl. Í endurmati á hinum fyrsta Púka sem fram fór síðasta haust kom fram að betur færi á að halda hátíðina að vori og því var ákveðið að kýla á næstu hátíð strax í vor, þó hún yrði minni í sniðum en sú fyrsta. Vestfirsk ungmenni völdu þema Púkans í ár sem er: Af hverju búum við hér?

Forsætisráðherra hefur stofnað nefnd um málefni Stranda sem tekið hefur til starfa. Markmið með skipan nefndarinnar er að skapa vaxtarskilyrði fyrir samfélag og atvinnulíf með sjálfbærni að leiðarljósi. Nefndin skal gera tillögur um hvernig megi efla byggðaþróun á svæðinu, m.a. með tilliti til fjárfestinga, atvinnuframboðs og atvinnutækifæra í Árneshreppi, Kaldrananeshreppi og Strandabyggð. Skila á forsætisráðherra tillögum eigi síðar en 1. júlí nk.

Rithöfundurinn Eiríkur Örn Norðdahl er einn þeirra sem stigu á stokk á málþinginu Af hverju orkuskipti: Loftslags- og orkuskiptaáætlanir sveitarfélaga sem haldið var í Edinborgarhúsinu á Ísafirði þann 8. febrúar. Erindi Eiríks Arnar nefnist „Það er heitt og það hitnar – um hamslausu þenslunnar hamslausu þenslu" og má sjá það og heyra hér.

Framlengdur umsóknarfrestur í Tækniþróunarsjóð. Nýr umsóknarfrestur er 22. febrúar næstkomandi klukkan 15:00.

Eitt verkefni á Vestfjörðum, Kuklið – frumkvöðlasetur matvæla, hlaut styrk úr aðgerð C1 sem er ætlað að efla byggðir landsins og er úthlutað til sértækra verkefna á sóknaráætlanasvæðum í samræmi við stefnumótandi byggðaáætlun fyrir árin 2022-2036. Það er Fjórðungssamband Vestfirðinga hlýtur styrkinn sem rennur til Kuklsins og er hann að upphæð kr. 15.000.000.

Stefán Gíslason, framkvæmdastjóri Environice kom fram á málþinginu Af hverju orkuskipti: Loftslags- og orkuskiptaáætlanir sveitarfélaga sem haldið var í Edinborgarhúsinu á Ísafirði þann 8. febrúar. Í erindi sínu fjallaði hann um áskoranir sveitarfélaga og talaði meðal annars um ábyrgð þeirra við að skapa framtíð og vera fyrirmyndir. Benti hann á helstu áskoranir vegna loftslagsbreytinga: hækkandi sjávarborði, öfgum í veðurfari, aukinni flóðahættu, breytingum á lífríki, þjóðflutningum og lýðheilsu.

Út um borg og bý nefnist málþing sem SSNE (Samtök sveitarfélaga og atvinnuþróunar á Norðurlandi eystra) stóð fyrir föstudaginn 9. febrúar. Þar var reynt að svara spurningunni, Hverju skilar samstarf nágranna og hvað prýðir gott sveitarfélag? Málþingið prýddi fjöldi áhugaverðra erinda sem tóku á þessum málum með einum eða öðrum hætti.

Theódóra Matthíasdóttir, sérfræðingur á skrifstofu loftslagsþjónustu og aðlögunar hjá Veðurstofu Íslands hélt erindi á málþinginu Af hverju orkuskipti: Loftslags- og orkuskiptaáætlanir sveitarfélaga, sem fram fór í Edinborgarhúsinu á Ísafirði þann 8. febrúar. Erindi hennar bar titilinn Áhrif loftslagsbreytinga á Íslandi – glóðvolgar niðurstöður Vísindanefndar um loftslagsbreytingar.

Á morgun, 15. febrúar, rennur út umsóknarfrestur í nokkra sjóði. Við hvetjum ykkur til að fylgjast með umsóknarfrestum í ólíka sjóði á heimasíðu Vestfjarðastofu, en þá er að finna á hægri væng síðunnar undir liðnum á döfinni.