Í gær hélt Vestfjarðastofa íbúafund í félagsheimilinu á Patreksfirði undir yfirskriftinni Framtíð Vestfjarða – þér er boðið að borðinu. Það var breiður hópur fólks víðsvegar af sunnanverðum Vestfjörðum sem sótti fundinn og fór þar fram kraftmikil vinna fundargesta sem mættu með bjartsýnina að vopni.

Á dögunum var styrkjum úthlutað til atvinnumála kvenna og voru tvær vestfirskar konur á meðal styrkþega. 33 verkefni hlutu styrk að þessu sinni. Þeirra á meðal var ræktun lífrænnar burnirótar á norðanverðum Vestfjörðum sem Harpa Lind Kristjánsdóttir stendur að og markaðsetning tilbúinna matvæla úr þangi sem Jamie Lee hjá Fine Foods Islandica vinnur að.

Í næstu viku verða haldnir íbúafundir um alla Vestfirði þar sem heimafólki er boðið að borðinu til að hafa áhrif á gerð svæðisskipulags fyrir Vestfirði og Sóknaráætlun Vestfjarða 2025-2029. Með því að mæta og taka þátt getur fólk haft sitt að segja um hvað fer inn í áætlanir og er okkur sem komum að vinnunni það mikið í mun að íbúar sjálfir upplifi eignarhald yfir þeim.

Barnamenningarhátíðin Púkinn steig aftur fram á vordögum og fór fram dagana 15. -26. apríl. Eftir fyrsta Púkann, sem var haldinn í september 2023, kom fram að betur færi á halda hátíðina að vori. Því var ákveðið að halda aðra hátíð strax vorið 2024, en hún yrði smærri í sniðum. Fyrsta hátíðin var styrkt af Barnamenningarsjóði en þessi sem nú fór fram af Sóknaráætlun Vestfjarða. Hátíðin var því haldin tvisvar á þessu skólaári, en hefur nú vonandi fundið sinn stað á dagatalinu og verður haldin aftur vorið 2025.

Í gær funduðu ferðaþjónar á Vestfjarðaleiðinni um lengingu ferðatímabilsins á Vestfjörðum með áherslu á vetrarferðaþjónustu. Fundurinn var vel sóttur, en yfir tuttugu ferðaþjónustuaðilar frá Vestfjörðum og úr Dölum mættu til leiks í Flókalund þar sem fundurinn fór fram.

Ferðamálastofa og Íslenski ferðaklasinn bjóða til ráðstefnu með metnaðarfullri dagskrá um nýsköpun og fjárfestingar í ferðaþjónustu. Viðburðurinn er hluti af nýsköpunarvikunni 2024. Við skorum á alla sem tengjast ferðaþjónustu með einum eða öðrum hætti að mæta. 

9. maí er Evrópudagurinn og af því tilefni er Evrópusamstarfi fagnað víða. Í dag er boðið á sérstaka uppskeruhátíð í Kolaportinu í Reykjavík þar sem Evrópusamvinnu er fagnað. Hátíðin ber yfirskriftina Evrópusamvinna í 30 ár og þar verður fagnað árangri undanfarinna ára. Vestfjarðastofa er um þessar mundir þátttakandi í tveimur Evrópuverkefnum. Annarsvegar er það orkuskiptaverkefnið RECET og hins vegar MERSE sem snýr að samfélagslegri nýsköpun.

Hæfnisetur ferðaþjónustunnar, SAF og Markaðsstofur landshlutanna boða til Menntamorguns ferðaþjónustunnar í streymi þriðjudaginn 14. maí kl. 9:00-9:45. Á fundinum verður sjónum beint að öryggismálum – gerð öryggisáætlana, áskoranir og tækifæri, hvernig sé hægt að stuðla að öryggismenningu innan fyrirtækja ásamt innsýn í reynslusögu ferðaþjónustufyrirtækis.

Starfsfólk Markaðsstofu Vestfjarða verður með fund fyrir aðila markaðsstofunnar og Vestfjarðaleiðarinnar á Hótel Flókalundi mánudaginn 13. maí. Á fundinum verður fjallað um þróun á vetrarferðaþjónustu á Vestfjarðaleiðinni.

Litla leikklúbbnum á Ísafirði boðið að sýna á stóra sviði Þjóðleikhússins.