Fræðslu- og verkefnasjóður
Markmið sjóðsins er að styrkja félags- og íþróttastarf ungmennafélagshreyfingarinnar í samræmi við stefnu UMFÍ, m.a. með því að auka menntun og þekkingu félaga innan hreyfingarinnar á íþróttagreinum, þjálfun í félagsmálum og félagsstarfi.
Rétt til umsóknar úr sjóðnum eiga sambandsaðilar UMFÍ, aðildarfélög sem eru virk í starfi og deildir innan þeirra.
Áherslur í úthlutun
Í samræmi við reglugerð sjóðsins leggur sjóðsstjórn áherslu á að veita styrki til:
- Fræðslu- og forvarnaverkefna sem eru til þess fallin að auka þekkingu og fagmennsku innan héraðs, félags og/eða deildar.
- Þjálfara- og/eða dómaranámskeiða.
- Verkefna sem stuðla að aukinni þekkingu og varðveislu á menningu og sögu héraðs, félags og/eða héraðs.
- Verkefna og/eða viðburða sem hafa það að markmiði að efla þjálfun forystufólks, leiðbeinenda og sjálfboðaliða í íþróttastarfsemi.
- Verkefni sem stuðla að stærðarhagkvæmni og samnýtingu í upplýsingatæknimálum.
Úthlutun styrkja
Athygli er vakin á því að sjóðurinn styrkir EKKI tækja-, áhalda- og búnaðarkaup, fundakostnað (þ.m.t. veitingar) og almennan rekstur félaga. Styrkur er að öllu jöfnu aldrei hærri en 400.000 kr. Sjóðsstjórn getur þó veitt hærri styrki í undantekningartilfellum.
- Fræðslu- og forvarnaverkefni hljóta að hámarki 70% styrk gegn kvittunum með lokaskýrslu.
- Þjálfara- og dómaranámskeið hljóta að hámarki 50% styrk gegn kvittunum með lokaskýrslu.
- Verkefni til varðveislu sögu og menningu hljóta að hámarki 50% styrk gegn kvittunum með lokaskýrslu.
- Verkefni og/eða viðburðir sem hafa það að markmiði að efla þjálfun forystufólks, leiðbeinenda og sjálfboðaliða í félagsmálum (fundarsköpum) hljóta að hámarki 70% styrk gegn kvittunum með lokaskýrslu.
- Nýsköpun og/eða samstarfsverkefni sambandsaðila hljóta að hámarki 70% styrk gegn kvittunum með lokaskýrslu.
Umsækjendur geta óskað eftir rökstuðningi sjóðsstjórnar við afgreiðslu sinnar umsóknar.
Lokaskýrsla
Umsækjendur sem hljóta styrk þurfa að skila inn skýrslu á ákveðnu lokaskýrsluformi og senda til þjónustumiðstöðvar UMFÍ á netfangið umfi@umfi.is.
Umsóknarfrestir eru tveir á ári. Fyrri umsóknarfrestur er frá 1. apríl til og með 1. maí og sá seinni frá 1. október til og með 1. nóvember.