Fjögur spennandi verkefni á Vestfjörðum hljóta styrk úr Framkvæmdasjóði ferðamannastaða 2025
Atvinnuvegaráðherra, Hanna Katrín Friðriksson, úthlutaði nýverið úr Framkvæmdasjóði ferðamannastaða fyrir árið 2025. Alls hlutu 28 verkefni styrk að heildarupphæð 553,2 milljónir króna, þar af fjögur á Vestfjörðum.
Markmið sjóðsins er að stuðla að uppbyggingu, viðhaldi og verndun ferðamannastaða um land allt, með áherslu á náttúruvernd, öryggi og aukið aðgengi. Í ár var lögð sérstök áhersla á að styðja verkefni á minna sóttum svæðum og við að lengja ferðamannatímabilið.
Styrkt verkefni á Vestfjörðum árið 2025:
1. Krossneslaug – nýr göngustígur og útsýnispallur
Styrkur: 11.382.000 kr.
Verkefnið felst í smíði útsýnispalls yfir Krossneslaug og strandlengjuna ofan frá, ásamt nýjum göngustíg niður að lauginni. Markmiðið er að bæta öryggi og aðgengi, ásamt því að vernda viðkvæma náttúru svæðisins. Krossneslaug er einn vinsælasti áfangastaður Árneshrepps og hluti af áfangastaðaáætlun Vestfjarða.
2. Kistuvogur – stækkun bílastæðis og náttúruvernd
Styrkur: 8.546.675 kr.
Styrkurinn fer í stækkun bílastæðis við vinsælan göngustíg að aftökustaðnum Kistuvogi. Bílastæðisskortur hefur valdið hættu fyrir gangandi og akandi vegfarendur og skemmt gróður. Framkvæmdir munu taka mið af umhverfinu með grjóthleðslum og náttúrulegum frágangi. Kistuvogur er hluti af áfangastaðaáætlun Vestfjarða.
3. Flateyri – útsýnispallur við Brimnesveg
Styrkur: 33.536.976 kr.
Um er að ræða byggingu útsýnispalls með skábrautum, stigum og aðgengisbúnaði við Brimnesveg á Flateyri. Á svæðinu verður einnig komið fyrir bekkjum, leik- og æfingatækjum, m.a. rennibraut og klifurvegg. Áhersla er lögð á algilda hönnun og aðgengi fyrir öll. Verkefnið fellur vel að markmiðum sjóðsins um aukið öryggi og bætt aðgengi.
4. Goðafoss í Bjarnarfirði – ný brú yfir Hallardalsá
Styrkur: 2.000.000 kr.
Styrkurinn fer í hönnun og uppbyggingu brúarstæðis yfir Hallardalsá við Goðafoss. Brúin mun bæta aðgengi og öryggi ferðamanna á svæðinu, þar sem aukin umferð beggja vegna fossins kallar á öruggari tengingu. Goðafoss er hluti af áfangastaðaáætlun Vestfjarða.
Mikilvægt verkfæri fyrir uppbyggingu
Framkvæmdasjóður ferðamannastaða hefur reynst afar mikilvægur fyrir uppbyggingu innviða á ferðamannastöðum víðs vegar um landið, ekki síst í dreifðum byggðum. Styrkirnir nýtast til að bæta aðgengi, auka öryggi og vernda viðkvæma náttúru. Það er ánægjulegt að sjá fjögur verkefni á Vestfjörðum fá styrk að þessu sinni og hvetur það áframhaldandi þróun á svæðinu.
Hvetjum til þátttöku í framtíðinni
Við hvetjum sveitarfélög, fyrirtæki og félagasamtök á Vestfjörðum til að nýta sér möguleikana sem felast í sjóðnum. Athygli er vakin á að verkefni sem eru hluti af áfangastaðaáætlun svæðisins fá aukin stig í gæðamati sjóðsins – og nú stendur yfir endurskoðun á áfangastaðaáætlun Vestfjarða. Nú er rétti tíminn til að láta til sín taka og leggja inn ný verkefni til framtíðar.