Opinn stefnumótunarfundur - Samtal um framtíð Edinborgarhússins

Stjórn Edinborgarhússins hefur hafið vinnu við að móta skýra stefnu fyrir Menningarmiðstöðina Edinborg til næstu ára.

Boðað er til opins stefnumótunarfundar þar sem rætt verður um hlutverk Edinborgarhússins í samfélaginu og hvernig við viljum sjá það þróast á næstu árum.

Fundurinn er ætlaður fólki með tengsl við húsið – hvort sem þau eru fagleg, persónuleg eða samfélagsleg. Markmiðið er að safna fjölbreyttum viðhorfum og hugmyndum sem nýtast munu í áframhaldandi stefnumótunarvinnu.

Í upphafi fundar verður stutt kynning á Edinborg, starfsemi hússins og rekstri í dag. Að því loknu verða umræður og hópavinna undir stjórn Vigdísar Jakobsdóttur menningarráðgjafa. Ekki er stefnt að því að komast að einni sameiginlegri niðurstöðu á þessum fundi – heldur er markmiðið fremur að ná fram fjölbreyttum sjónarmiðum og kortleggja hugmyndir sem munu nýtast í áframhaldandi stefnumótunarvinnu. Þátttakendur þurfa ekki að undirbúa sig sérstaklega fyrir fundinn.

Samtalið fer fram í Edinborgarsal fimmtudaginn 22. maí 2025 kl. 16:00-18:30 og boðið verður upp á veitingar.