Stjórnsýslu- og fjármálasvið Ísafjarðarbæjar auglýsir laust til umsóknar starf gjaldkera á skrifstofum Ísafjarðarbæjar. Um er að ræða 55% starf. Æskilegt að viðkomandi geti hafið störf 16. nóvember eða eftir nánara samkomulagi.
Gjaldkeri ber ábyrgð á meðhöndlun og greiðslu reikninga sveitarfélagsins, í gegnum gjaldkerakerfi og með millifærslum í banka. Hann ber ábyrgð á frágangi þeirra skjala og annarra gagna sem hann vinnur með hverju sinni bæði til tímabundinnar og varanlegrar geymslu. Gjaldkeri ber ábyrgð, ásamt öðrum, á gjaldaliðum og ber nokkra ábyrgð á fjármálum og skal hafa yfirsýn yfir viðskiptaskuldir sveitarfélagsins. Gjaldkeri er í miklum samskiptum við lánardrottna, forstöðumenn og aðra starfsmenn Ísafjarðarbæjar.
Gjaldkeri er í reglulegu sambandi við fjármálastjóra um stöðu reikninga, lausafjárþörf og fjárstýringu sveitarfélagsins. Gjaldkeri sér jafnframt um afstemmingar lánadrottna sveitarfélagsins með reglulegum hætti, tekur þátt í yfirferð og leiðréttingu á tekju- og útgjaldaliðum og fylgir eftir kröfum í samráði við innheimtufulltrúa.
Gjaldkeri aðstoðar með afleysingu í afgreiðslu bæjarskrifstofu, opnun og lokun og móttöku gesta og viðskiptavina á vinnutíma sínum.
Næsti yfirmaður er sviðsstjóri stjórnsýslu- og fjármálsviðs, en dagleg stýring verkefna er hjá fjármálastjóra.
Helstu verkefni
- Greiðsla reikninga og eftirfylgni á samþykkt reikninga
- Móttaka innborgana til sveitarfélagsins
- Uppgjör sjóðs
- Yfirsýn yfir viðskiptaskuldir Ísafjarðarbæjar
- Upplýsingagjöf við fjármálastjóra um stöðu reikninga og lausafjárþörf
- Samskipti við forstöðumenn og aðra starfsmenn Ísafjarðarbæjar
- Samskipti við lánadrottna
- Afstemming viðskiptareikninga
- Þátttaka í yfirferð og leiðréttingu á tekju- og útgjaldaliðum
- Eftirfylgni krafna í samráði við innheimtufulltrúa
- Veita faglega og góða þjónustu við viðskiptavini sem þjónustunnar njóta
- Ýmis almenn skrifstofustörf, s.s. umsjón afgreiðslu og skjalavinnsla, auk tilfallandi verkefna
- Önnur verkefni sem yfirmaður kann að fela honum og tengjast starfinu
Menntunar- og hæfniskröfur
- BSc Stúdentspróf eða sambærileg menntun
- Háskólapróf í viðskiptafræði eða tengdum greinum er kostur
- Reynsla af sambærilegu starfi æskileg
- Þekking á BC365 eða sambærilegu fjármálakerfi er kostur
- Talnagleggni, skipulagshæfni, vandvirkni og nákvæmni
- Hæfni í mannlegum samskiptum, sveigjanleiki og rík þjónustulund
- Frumkvæði og sjálfstæði í vinnubrögðum
- Mjög góð færni í excel og word, auk góðrar almennrar tölvuþekkingar
- Góð íslenskukunnátta
Launakjör eru samkvæmt samningum Sambands íslenskra sveitarfélaga við viðkomandi stéttarfélag.
Umsóknarfrestur er til og með 9. september 2026. Umsóknum skal skilað til sviðsstjóra stjórnsýslu- og fjármálasviðs Ísafjarðarbæjar á netfangið bryndis@isafjordur.is. Með umsókn skal fylgja ferilskrá og afrit af prófskírteinum. Umsókn getur gilt í 6 mánuði.
Nánari upplýsingar veitir Bryndís Ósk Jónsdóttir, sviðsstjóri stjórnsýslu og fjármálasviðs í gegnum tölvupóstfangið bryndis@isafjordur.is.
Við hvetjum áhugasöm, óháð kyni til að sækja um starfið. Vakin er athygli á markmiði mannréttindastefnu Ísafjarðarbæjar að jafna kynjaskiptingu innan starfsgreina og að vinnustaðir endurspegli fjölbreytileika samfélagsins. Öllum umsóknum verður svarað þegar ákvörðun um ráðningu hefur verið tekin.
-Við þjónum með gleði til gagns-