Stjórn Vestfjarðastofu tekur undir bókun bæjarstjórnar Vesturbyggðar þar sem hún gerir alvarlegar athugasemdir við ákvörðun Vegagerðarinnar að taka ferjuna Baldur úr áætlunarsiglingum yfir Breiðafjörð í þriðja sinn á skömmum tíma. Stjórn Vestfjarðastofu hefur fullan skilning á þeirri erfiðu stöðu sem uppi er með áætlunarsiglingar Herjólfs til Vestmannaeyja og alvarlegt er að stjórnvöld hafi ekki tryggt þar fullnægjandi samgöngur.
Á sama tíma telur stjórn Vestfjarðastofu það með öllu óboðlegt að sú staða sem uppi er komi niður á þjónustu í heilum landsfjórðungi sem ekki nýtur samkeppnishæfra innviða, skerðingu á fjölda flugferða og situr uppi með eilífar tafir í vegaframkvæmdum. Hefur þessi ákvörðun Vegagerðarinnar mjög slæm áhrif á árstíðarbundna ferðaþjónustu á Vestfjörðum sem er viðkvæm. Með ákvörðunum sem þessari vinnur Vegagerðin gegn áframhaldandi efnahagslegum vexti Vestfjarða og verðmætasköpun á svæðinu.
Stjórn Vestfjarðastofu tekur undir kröfu bæjarstjórnar Vesturbyggðar um að Vegagerðin falli frá ákvörðun sinni um að taka ferjuna Baldur úr áætlunarsiglingum yfir Breiðafjörð á þessum tíma þar sem hún er ekki í samræmi við samning um að ferjan Baldur sigli ef Herjólfs nýtur ekki við þar sem Herjólfur er þegar í siglingum milli lands og eyja.