Fara í efni

Hringvegur 2

Hringvegur 2
Ferðaþjónustan á Vestfjörðum hefur talað fyrir því að Vestfjarðahringurinn sem verður til við gerð Dýrafjarðarganga og veg yfir Dynjandisheiði verði skilgreindur sem Hringvegur 2. Með þróun á Hringvegi 2 er verið að skapa nýtt aðdráttarafl fyrir Vestfirði og Ísland sem byggir á upplifun og afþreyingu. 

Verkefnið tekur til þróunar, undirbúnings og opnunar ferðamannaleiðarinnar Hringvegs 2 og stuðla með því að lengingu ferðamannatímabilsins og auka þannig arðbærni ferðaþjónustunnar á svæðinu. Hringvegur 2 snýst ekki um að keyra Vestfjarðahring á sem skemmstum tíma, heldur að stoppa, njóta og upplifa. Þá er horft til þess að tengja vestfirskan mat og matarupplifun inn í ferðalagið. 

Vestfjarðastofa hefur umsjón með verkefninu og hefur ráðið til sín breska ráðgjafafyrirtækið Blue Sail sem hefur komið að þróun ýmissra ferðamannaleiða meðal annars Arctic Coast Way á Norðurlandi og Wild Atlantic Way á Írlandi.

Í byrjun september voru haldnar þrjár vinnustofur með hagsmunaaðilum og voru þær haldnar á Ísafirði, Patrekstfirði og í Dölunum. Voru fundargestir þar látnir skilgreina helsta aðdráttarafl og upplifanir sem fylgja Vestfjarðahringnum. Mikið var rætt um helstu náttúruperlur Vestfjarða og þá afþreyingarmöguleika sem eru fyrir hendi.

Næstu skref verkefnisins verða að vinna úr þeim miklu upplýsingum sem komu fram á vinnustofunum og halda áfram að skilgreina einstaka upplifun þessarar ferðamannaleiðar.

Verkefnið hlaut styrk frá Ferðamálastofu árið 2018, til þriggja ára, en jafnframt fékk verkefnið styrk sem áhersluverkefni Sóknaráætlunar.