Fara í efni

Áfangastaðaáætlun Vestfjarða

Áfangastaðaáætlun Vestfjarða
Áfangastaðaáætlun Vestfjarða er heildstæð áætlun sem snýst um uppbyggingu ferðaþjónustu og áfangastaða. Í áætluninni er leitast við að sjá þessa þróun frá mörgum ólíkum sjónarhornum og að taka tillit til sem allra flestra sem eiga hagsmuna að gæta. 

Markaðsstofur landshlutanna vinna að áfangastaðaáætlunum sinna svæða, en Stjórnstöð ferðamála og Ferðamálastofa standa á bakvið verkefnið á landsvísu. Í Áfangastaðaáætlun Vestfjarða er staða ferðaþjónustunnar skoðuð og sett fram framtíðarsýn, markmið og aðgerðaáætlun.

Markmið Áfangastaðaáætlunar er að stuðla að ábyrgri ferðaþjónustu sem skilar sem mestu til samfélagsins um leið og mögulegum neikvæðum áhrifum er haldið í lágmarki. Áætlunin tekur tillit til gesta, íbúa, fyrirtækja og umhverfis og reynir að skapa jafnvægi. Hún auðveldar íbúum að hafa áhrif á hvernig ferðaþjónustan þróast og hvaða skref skuli taka. Þannig eru meiri líkur á að uppbyggingin hafi jákvæð áhrif á efnahag og samfélag.