Ráðgjöf fyrir veitinga- og kaffihús

Vestfjarðastofa, í samstarfi við Hinrik Carl Ellertsson matreiðslumeistara, býður upp á ráðgjöf fyrir veitinga- og kaffihús á Vestfjörðum. Verkefnið er í tengslum við  Vestfjarðaleiðina og gengur út á að efla veitingastaði á svæðinu. Áhersla verður lögð á að aðstoða þátttakendur við að finna og vinna með sína sérstöðu og leita lausna við áskorunum hvers og eins. Unnið verður með árstíðabundna hugmyndafræði, hráefni úr nærumhverfi og sjálfbærni í rekstri veitingastaða. Þátttakendur fá fræðslu og aðstoð við uppsetningu matseðla og annað sem viðkemur rekstri veitingastaðarins.  Að bjóða upp á góðan mat og bjóða fólk velkomið er svo sannarlega hluti af vestfirskri matarmenningu. 

Verkefnið er samsett af fyrirlestrum og einkaráðgjöf ásamt því að Hinrik heimsækir veitingastaðina og vinnur með þeim að þeim verkefnum sem fyrir liggja.

Innifalið er:

Fyrirlestur: 
Þar sem áhersla verður lögð á mikilvægi þess að skapa sér sérstöðu, uppsetningu matseðla, nýtingu hráefnis úr nærumhverfi ofl.

Ráðgjöf x 2:
Einkaráðgjöf bæði fyrir og eftir heimsókn Hinriks þar sem farið er yfir stöðuna, áskoranir og markmið.

Heimsókn:
Hinrik heimsækir veitingastaðinn, kynnir sér starfsemina betur og vinnur með viðkomandi að þeim markmiðum sem sett hafa verið.

Eftirfylgni: 
Ráðgjafar Vestfjarðastofu í samstarfi við Hinrik vinna saman að því að fylgja eftir þeim verkefnum og markmiðum sem hver og einn hefur sett sér.