Fara í efni

Reynsla Troms fylkis af laxeldi - Fundir á Ísafirði og Tálknafirði

Fréttir

Fimmtudaginn 8. ágúst verða haldnir spjallfundir á Ísafirði og Tálknafirði um möguleg áhrif laxeldis á Vestfirði. Það er Matís og Vestfjarðastofa sem boða til fundanna og fyrirlesari verður Gunnar Davíðsson sem er ráðgjafi hjá Troms fylki í norður Noregi. Fundurinn á Ísafirði verður í Vestrahúsinu kl. 12-13 og á Tálknafirði verður fundurinn í Dunhaga kl. 20-21.

Norðmenn framleiða um 1.3 milljónir tonn í sjókvíaeldi sem skilar um 840 milljörðum (ISK) króna á ári og skapar um 33 þúsund ársverk. Eitt ársverk í Noregi skapar um 14 milljón kr. í þjóðarauð að meðaltali (fyrir utan olíuvinnslu), en fiskeldi skilar hins vegar um 63 miljónum kr. og fiskveiðar skila 21 miljónum kr og fiskvinnsla um 15,1 milljónum.

Fiskeldi er mikilvæg atvinnugrein í Troms fylki, sem er um 26 þúsund km2 með um 7.200 km strandlengju og íbúafjöldi er 167 þúsund, en þeir framleiða um 190 þúsund tonn á ári. Um 10 seiðaeldisstöðvar eru starfræktar í Troms, 16 mateldisfyrirtæki með níu sláturhús; fyrirtæki sem keyptu vörur og þjónustu í fylkinu fyrir um 35 milljarða kr á ári. Störf í fiskeldi í fylkinu dreifast mjög vel um hin ýmsu sveitarfélög, sem eru 24 í dag. Um 70% þjónustu og verslun aðfanga eru frá fyrirtækjum í Troms og nágrannafylkinu Nordland. Eldið og þjónustan í kringum atvinnugreinina kallar á bæði verkmenntun og sérfræðiþekkingu, laðar að ungt fólk enda launin með því besta sem þekkist í norskri atvinnustarfsemi.

Til að byggja upp svo öfluga atvinnugrein eins og eldið er í Troms hefur þurft að byggja upp öflugar samgöngur, enda byggir framleiðslan á ferskum laxi sem liggur á að koma á markaði í Evrópu, Ameríku og Asíu. Fiskeldi hefur aukið aðsókn í verkmenntun og háskólanám tengt greininni og jafnframt haft jákvæð áhrif á ferðaþjónustu í fylkinu.

Á fundunum verður farið yfir áhrif fiskeldis á efnahag og íbúaþróun í Troms og velt upp hvaða áhrif eldi á Vestfjörðum getur haft í fjórðungnum. Getum við dregið lærdóm af sögu laxeldis í Troms fylki til að meta áhrif þess á mannlíf og efnahag Vestfjarða í framtíðinni?

Glærur Gunnars Davíðssonar