Vegir og vegalengdir

Hér kemur stutt umfjöllun um vestfirska vegi - sagt frá vegunum og vegagerð sem er yfirstandandi, bundnu slitlagi og fleiru slíku.

Hér er einnig að finna tengil á vegalengdasíðu Vegagerðarinnar, en þar geta menn fræðst um vegalengdir frá þéttbýlisstöðum á Vestfjörðum.

Eins eru hér tenglar inn á síðu með veðurmyndavélum á Ennishálsi á Ströndum (á vegi 61), Steingrímsfjarðarheiði (á vegi 61) sem liggur á milli Hólmavíkur og Ísafjarðardjúps og Gemlufallsheiði milli Dýrafjarðar og Önundarfjarðar á veg 60. Þá skal bent á yfirlitsmynd Vegagerðarinnar um færð og veður á Vestfjörðum.

Veghefill i vanda - ljósm. Jenný Jensdóttir

Aðalvegir á Vestfjörðum

• Vestfjarðavegur - nr. 60 liggur frá þjóðvegi 1 í Norðurárdal í Borgarfirði og fyrst um Bröttubrekku til Búðardals og áfram um Gilsfjarðarbrú inn á Vestfirði. Hann liggur síðan í gegnum Reykhólasveit vestur í Vatnsfjörð, m.a. um Ódrjúgs- og Hjallahálsa og Klettsháls.
  
  Vegurinn liggur síðan áfram frá Flókalundi yfir Dynjandisheiði og síðan um Hrafnseyrarheiði sem er hæsti fjallvegur á Vestfjörðum, en vegurinn þar nær 552 m hæð yfir sjávarmáli. Vegurinn kemur þar niður að Þingeyri og liggur síðan yfir Gemlufallsheiði að Flateyri við Önundarfjörð, en síðan í gegnum Vestfjarðagöngin til Ísafjarðar.
  
  
• Djúpvegur - nr. 61 liggur frá hringveginum við Brú í Hrútafirði, norður Strandir til Hólmavíkur, síðan yfir Steingrímsfjarðarheiði yfir í Ísafjarðardjúp og til Súðavíkur og Ísafjarðar. Vegurinn er yfirleitt ágætur yfirferðar og búið er að leggja bundið slitlag á 75 af 115 km á leiðinni til Hólmavíkur. Ástæða er þó til að vara við einbreiðri klæðningu í Bitrufirði og biðja ökumenn að fara varlega þar við framúrakstur og þegar þeir mæta bílum. Hæsti punktur á leiðinni til Hólmavíkur er 290 m yfir sjávarmáli á Ennishálsi milli Bitru og Kollafjarðar. Þar eru varasamar beygjur í bröttum hálsinum. Stikuháls á milli Hrútafjarðar og Bitru er mun lægri eða 165 m.
  
  Vegurinn frá Hólmavík vestur á Ísafjörð um Djúp og Steingímsfjarðarheiði hefur tekið miklum framförum síðustu ár, enda hefur mikið verið unnið í honum. Lögð hefur verið klæðing á mestan hluta leiðarinnar, eða alls um það bil 180 km af 224 (ef vegurinn um Hestakleif (Eyrarfjall) er opinn, en leiðin er lengri ef fara þarf veg nr. 633 út á Reykjanes). Vegurinn frá Ísafirði á Hólmavík liggur hæst á Steingrímsfjarðarheiði - 439 m yfir sjávarmál og nær 360 m hæð á Eyrarfjalli.

Heiðar og tengingar milli svæða:

• Haukadalsskarð - liggur frá vegi nr. 60 fram Haukadal, vegnúmer 586 og síðan um illfæran jeppaveg um Haukadalsskarð yfir að Melum í Hrútafirði.
  
  
• Laxárdalsheiði - nr. 59 - Laxárdalsheiði er 35 km langur heilsársvegur frá Búðardal yfir í Hrútafjörð, kemur niður 2 km norðan við Borðeyri. Hann liggur hæst í 200 m hæð yfir sjávarmáli.
  
  
• Steinadalsheiði - nr. 69 (sumarvegur) - (29 km milli vega 60 og 61) liggur frá vegi 60 við sunnanverða Gilsfjarðarbrú, inn með Gilsfirði og upp úr botni fjarðarins yfir heiðina niður í botn Kollafjarðar. Leiðin er einungis sumarvegur og satt best að segja frekar seinfarinn og varla við hæfi fólksbíla. Steinadalsheiði er 330 m há.
  
  
• Tröllatunguheiði - vegur nr. 605 (sumarvegur) - (26 km) liggur úr norðanverðum Gilsfirði (frá Króksfjarðarnesi við norðanverða Gilsfjarðarbrú) yfir á Strandir og kemur niður 7 kílómetrum sunnan við Hólmavík. Tröllatunguheiði er seinfarinn sumarvegur, fær öllum bílum. Fyrir smábíla er frekar mælt með Tröllatunguheiði en Steinadalsheiði af leiðum sem koma niður sunnan Hólmavíkur, þó hún sé brött að vestanverðu. Tröllatunguheiði er 420 m há.
  
  
• Þorskafjarðarheiði - nr. 608 (sumarvegur) - (23 km) liggur frá Þorskafirði í Reykhólasveit og liggur inn á Djúpveg nr. 61 á miðri Steingrímsfjarðarheiði. Þannig tengir hann saman Strandir, Djúp og Reykhólasveit. Vegurinn er fær öllum bílum eftir að hann er opnaður, yfirleitt í fyrri hluta júnímánaðar.
  
  
• Kollafjarðarheiði - nr. F66 (jeppavegur) - . Vegurinn um Kollafjarðarheiði nær 460 m. hæð
  
  

Aðrir vegir í Barðastrandarsýslum

• Gilsfjarðarvegur - nr. 602 Vegurinn sem liggur fyrir Gilsfjörð ef ekki er ekið yfir Gilsfjarðarbrú. Úr botni Gilsfjarðar má fara sumarveg um Steinadalsheiði yfir í Kollafjörð á Ströndum.
  
  
• Reykhólar - nr. 607 Afleggjari af Vestfjarðavegi nr. 60, frá Bjarkalundi að Reykhólum og áfram út á Reykjanesið.
  
  
• Barðaströnd - nr. 62 Vegurinn liggur um Barðaströnd milli Flókalundar og Patreksfjarðar. Farþegar sem koma með Baldri koma að Brjánslæk koma að þessum vegi. Bundið slitlag er alla leiðina milli Flókalundar og Patreksfjarðar eftir vegi 62.
  
  
• Bíldudalur, Tálknafjörður Patreksfjörður - nr. 63. Vegur sem liggur frá vegi nr. 60 og til Patreksfjarðar um Bíldudal og stuttur afleggjari er út á Tálknafjörð. Bundið slitlag er frá Bíldudal að Patreksfirði og út á Tálknafjörð.
  
  
• Látrabjarg - nr. 612. Afleggjari af vegi nr. 62 við botn Patreksfjarðar. Liggur að Örlygshöfn og Látrabjargi.
  
  
• Selárdalur - nr. 619. Afleggjari af vegi nr. 63 frá Bíldudal og út með Arnarfirði sunnanverðum.

Aðrir vegir í Ísafjarðarsýslum

• Flateyri - nr. 64
  
  
• Suðureyri - nr. 65
  
  
• Bolungarvík - nr. 61 - lengra 630
  
  
• Út á Reykjanes - nr. 633
  
  
• Vegurinn við norðanvert Djúp - nr. 635

Vegirnir á Ströndum norðan Hólmavíkur

• Strandavegur - nr. 643 -. Liggur frá Djúpvegi nr. 61 í botni Steinrímsfjarðar og norður í Árneshrepp. Vegirnir á Ströndum norðan Hólmavíkur eru misjafnir. Stysta leið norður í Árneshrepp er um Bjarnarfjarðarháls (nr. 643), en ef nægur tími er fyrir hendi er gaman að sleppa hálsinum á annarri leiðinni og aka hringleiðina út á Drangsnes (veg 645) í staðinn. Vegurinn um Bjarnarfjarðarháls (180 m hæð yfir sjávarmáli) er stuttur en varasamur, blindhæðir og beygjur setja svip á hann. Vegurinn norður í Árneshrepp liggur síðan norður Bala og hefur verið lagfærður mikið síðustu ár. Síðan liggur leiðin um annan lágan háls, Veiðileysuháls 220 m hár, áður en komið er að Djúpavík við Reykjarfjörð.
  
  Kaflar á veginum norður í Árneshrepp, norðan Bjarnarfjarðar, hafa verið lagaðir mikið á síðustu árum, en á milli eru gamlir niðurgrafnir vegir þar sem sýna þarf aðgætni og fara hægt yfir. Hið sama gildir um veginn frá Djúpavík að Gjögri, en norðar í Árneshreppi er ágætur vegur. Vegir færir öllum bílum ná lengst í norður að bæjunum Felli, Munaðarnesi og Eyri í Ingólfsfirði. Frá Eyri í Ingólfsfirði liggur síðan jeppavegur áfram að Ófeigsfirði, en norðar fer enginn nema á fæti.
  
  Yfir veturinn lokast vegurinn norður í Árneshrepp og er oft ekki opnaður í nokkra mánuði. Þetta er breytilegt eftir árum, eftir því hve snjóþungt er. Eins er Strandavegur yfir Bjarnarfjarðarháls stundum lokaður um lengri eða skemmri tíma yfir veturinn, en þá er mokað hringleiðina um Drangsnesveg (nr. 645) í Bjarnarfjörð.
  
  
• Drangsnesvegur - nr. 645. Liggur frá Strandavegi (nr. 643) við sunnanverðan Bjarnarfjarðarháls og er hringleið (liggur út að Drangnesi og áfram í Bjarnarfjörð og aftur að Strandavegi 7 km norðar). Leiðin út á Drangsnes um Selströnd hefur verið lagfærð mikið á síðustu árum og er nú bundið slitlag frá vegamótum við Bjarnarfjarðarháls Steingrímsfjarðarmeginn að Drangsnesi. Vegurinn áfram frá Drangsnesi inn í botn Bjarnarfjarðar er hins vegar gamall og úr sér genginn.